Рок попынхны дундаас чадалтай хоолойгоороо ялгарч, “жинхэнэ дуучин” хэмээн үнэлэгддэг нэгэн бол яах аргагүй Б.Маралжингоо. Гэвч түүнийг сүүлийн үед дорвитой уран бүтээл хийхгүй байна хэмээн шүүмжлэх хүн олон бий.
Харин тэрбээр энэ хугацаанд зүгээр суугаагүй бөгөөд тун удахгүй үзэгч, сонсогчидтойгоо уран бүтээлээрээ уулзах гэнэ. Ярилцаж суухдаа байн байн хацраа даран улайх хүүхдээрээ зантай энэ бүсгүй өөрийгөө меланхолик төрлийн, тав тухыг эрхэмлэдэг хүн хэмээн тодорхойлсон.Түүнтэй ярилцсанаа хүргэе.
-Сүүлийн үед яагаад таг болчихов. Шинэ уран бүтээл хийж байна уу?
-Эрчимтэй уран бүтээл хийе гэхээр нэг л эвлэж өгөөгүй юм аа. Сайн уран бүтээл хийхийн тулд туршлага хэрэгтэй. Ая зохиогч, продюсерийн мундагт түшиглэн яаруу сандруу дуу хийвэл өөрийн юм биш болно. Тиймээс сайн уран бүтээл болохгүй шүү дээ. Энэ хугацаанд туршлага хуримтлууллаа. Ая зохиогч Ганг, дуучин Дэйзи, дууны инженер Рагутай хамтран шинэ дуунууд дээр ажиллаад, бараг дуусаж байгаа. Одоогоор долоон дуутай болчихож. Удахгүй шинэ цомгоо олонд хүргэнэ дээ.
-Хөгжмийн зохиолч Гангийн мэдрэмжээр бүтсэн ая таны мэдрэмжтэй хэр уусан нэгдэж чадсан бол?
-Тэр хүний ая, мэдрэмжүүд сонирхолтой санагдсан. Ийм дуу хийе гээд ярилцахад ч санаа нийлж, яг миний хүссэн аяыг зохиож өгсөн. Шинэхэн дуунууд маань өнгөц сонсоход таалагдахаасаа илүү мэдрэмжийн натурал бүтээлүүд байгаа. Яг нэг төрлийг бариагүй. Залуу хүний хувьд амьдралаас суралцаж байгаа туршлагаасаа хуваалцах, ал даанаасаа суралцах гэх мэт өөрт тохиолдсон янз бүрийн зүйлээ дуундаа дуулсан.
-SBN телевизийн “Манай аялгуу” төслийн хүрээнд дуулсан “Жаргаах зүрхэн” дуу тань үзэгчдээс өндөр үнэлгээ авсан. Б.Зангад гуайгаас зөвлөгөө авсан уу?
-Хүн бүхний мэддэг мундаг дууг хамаагүй оролдох хэцүү учраас бага зэрэг сандарсан. Сайхан дуу хийх гэхээр ерөөсөө олигтой болж өгөхгүй, миний хоолойны өнгө дээр ч биш, доор ч биш, бас хэт хоолойгоо шахаж дуулаад байгаа юм шиг санагдаад нэлээд нухсан шүү. Дээр үеийн дуунуудыг бодоход үзэсгэлэнт байгаль мэдрэгдсэн, нэг л сайхан дуниартсан уянгалаг дуу болохоор орчин үеийн залуус ойлгоход амар байсан болов уу. Дуугаа бүтээж дуусгаад Соёлын төв өргөөнд Б.Зангад гуай дээр цэцэгтэй очиж, албан ёсоор сонсгосон. Мундаг зоригтой байгаа биз.
-Тайзан дээр дуулах, студид дуугаа бичүүлэх хоёрын алинаас нь илүү таашаал авдаг вэ?
-Шинэ дуу төрүүлэх гоё. Ажил гэж бодогдож, хэн нэгэнд зориулж дуулалгүй, өөрийгөө жаргааж байгаа хэрэг. Эрч хүчтэй цоглог дуу дуулбал зүрхний цохилт хурдасч, дотроосоо буцалдаг бол уянгын дуунд үүлэн дээр хөвж байгаа юм шиг санагддаг. Гэхдээ уур амьсгал бүрдээд үзэгчид эмоцитой хүлээж авбал тайзан дээр дуулах ч гоё. Тэднээс урам авч, өөртөө итгэлтэй болдог. Зарим үед үгээ мартах зэрэг хөгтэй байдалд ч орно. Одоохондоо тайзан дээр хангалттай галзуурч үзээгүй л байна. Хэрвээ тэгж чадвал бүр илүү таашаалыг мэдрэх байх.
-Нэгэн үе дуучин Болдын “B” продакшнд харьяалагддаг байсан. Яагаад гарчихсан юм бэ?
-Нэг цомгийн гэрээтэй байсан. Тэр маань дууссан. Цаашид гэрээгээ сунгаж болох байсан ч өөрөө бие дааж ажиллахыг бодсон. Олон нийтийн сонирхож байгаа дууг биш, өөрийн мэдрэмждээ хөтлөгдөж, хүссэн уран бүтээлээ хиймээр байна. Миний дуунууд хүмүүст хэрэгтэй, өөрийгөө сонирхолтой хүн гэж боддог учраас одоо хийж байгаа уран бүтээлүүд сонсогчдод таалагдах байх аа.
-Таны бодлоор хамгийн сайхан дуу гэж ямар бүтээлийг хэлэх вэ?
-Үг, ая хоёулаа нийцвэл дуу гоё болно. Мөн тэр нь хүнд хүрч чадвал гайхалтай. Хөгжим өөрийн хэлтэй болохоор юу өгүүлээд байгаа нь мэдэгддэг. Гэхдээ хамгийн гоё дуу гээд нэрлэх гэхээр хэцүү юм. Тухайн нөхцөл, хэн, яаж мэдэрч байгаагаас шалтгаална.
-Таныг дуучин болохоор заяагдсан хүн гэж боддог. Хэрвээ дуучин биш байсан бол ямар мэргэжилтэй болох байсан бэ?
-Өөрийгөө дуугүйгээр төсөөлж чаддаггүй. Хүслээр болбол дуулаад л баймаар байна шүү. Дуу хөгжим миний амьдралд их нөлөөлдөг. Сэтгэл санаа тавгүй байвал дуугаар эмчилнэ. Дуулахгүй юм аа гэхэд дуу хөгжимтэй ямар нэгэн байдлаар холбоотой л байна байх. Дууны үг, ая аль алиныг нь зохиох гэж оролддог. Заримдаа бүр шөнө шүлэг зохиомоор санагдвал босож ирээд л бичиж гарна даа. Сайхан ая зохиох гэхээр тэр үедээ таалагдаж байсан ч дараа нь сонсоход арай биш санагдаад байдаг юм.
-Таны дуунууд ихэвчлэн хайрын сэдэвтэй. Залуу хүн учраас ийм дуу их дуулдаг юм болов уу?
-Хайрын дуу ихдээд байна гэж үгүйсгээд байвал утгагүй. Хүн бүхэнд хамгийн чухал зүйл бол хайр. Тэгэхээр хөгширсөн хойноо ч хайрын дуу дуулах л байх. Гэхдээ одоогийнхоос илүү туршлагатай, ухаалгаар дуулах байх.
-Өвөө тань жүжигчин хүн байсан гэж сонссон. Өвөөгийнхөө талаар яриач?
-“Тунгалаг тамир”-ын Бадарч тахар, “Энэ хүүхнүүд үү” киноны Идэрийн дүрийг бүтээсэн Ч.Цэрэннадмид гэж хүн байсан. Дээр үед өөд болсон болохоор дэлгэцэнд мөнхөрсөн дүрээс нь л харж байсан. Гэхдээ ээжээсээ зөндөө сайхан зүйл сонсдог. Ном их уншдаг, өвөрмөц сэтгэдэг, бүтээлч, нэлээд сахилгагүй байрын хүн байсан шиг санагддаг. Ямар сайндаа гэрлийн бүрхүүлийг сонингоор хийчихсэн байсан гэх вэ дээ.
-У.Шекспир “Амьдрал бол тайз, хүмүүс бол жүжигчид” гэж хэлсэн байдаг. Өөрөө хэр жүжигчин бэ?
- У. Шекспирийн энэ үгийг 100 хувь мэдрэхийг хүсвэл Майкл Жексон шиг од байх хэрэгтэй байх болов уу. Тэгтлээ олны нүдэнд ил байдаггүй болохоор жүжиглээд байх хэрэг надад гардаггүй. Харин хувь хүн гэдэг өнцгөөс хэн нэгний сайн сайхны төлөө, аятайхан сэтгэгдэл төрүүлэхийн тулд худлаа ярихыг нүгэл гэж боддоггүй. Гэхдээ тунг нь хэр тааруулахаас шалтгаална л даа.
-Тэгвэл та одоо жүжиглэж байна уу?
-Өөр хүн шиг жүжиглэх гэхээр удаан тэсдэггүй. Төлөвлөөд жүжиглэж байтал нэг мэдэхэд өөрийнхөөрөө болчихсон байдаг.
-Таныг хэн нэгэнтэй чин сэтгэлээсээ харилцах гэхээр дуучин гэсэн утгаар хандаж, хана босгоод байгаа юм шиг санагддаг уу?
-Олон хүний найз хэний ч найз биш гэдэг. Би тийм ч олон найзтай, хүрээлэл олонтой хүн биш. Миний найзууд их удаан нөхөрлөсөн хүмүүс болохоор тийм зүйл байдаггүй.
-Зарим эмэгтэй таргалах, хөгшрөх гэх мэт зүйлээс айдаг. Та юунаас айдаг вэ?
-Ээж, аав хоёрыгоо алдахаас айдаг. Хүүхдүүд нэг төрлийн юмнаас, том хүн бас өөр зүйлээс айдаг байх. Жишээ нь, залуухан охид хөгшрөхөөс айдаг. Энэ нь одоо үеийнх нь л бодол. 40 хүрээд тэд хөгшрөхөөс айхгүй, өөр санаа зовох юмтай болох учраас насны онцлогоос шалтгаалаад тайвширчихна байх. Тиймээс иймэрхүү зүйлээс айхгүй. Харин аль ч насандаа аав, ээж хоёрыгоо үгүйлж, хамт байхыг хүснэ.
-Таны бодлоор ямар эмэгтэйг сайхан гэх вэ?
-Магадгүй 17 настайд асуусан бол нэг хөөрхөн хүний нэр хэлэх байх. Бүх талаараа ээж шиг минь санагдсан хүнийг л сайхан гэнэ дээ. Гэхдээ эхэндээ сайхан сэтгэгдэл төрүүлээд байсан тэр хүн таалагдахаа больж болно. Ийм зүйл тохиолдвол тэр хүнийг сайн хүн гэж тултал дээд оноо өгсөн миний л алдаа. Яагаад гэвэл хүн л юм чинь сул талтай байж таараа.
-83 кг-аас 49 кг болтлоо турж чадсан нууцаасаа хуваалцахгүй юү?
-Турахын тулд маш шаргуу хөдөлмөрлөх хэрэгтэй. Идэж байгаа зүйлээ судалж, олон зүйл бодолгүй дасгалаа хийгээд байвал нэг мэдэхэд л турчихна. Зарим хүн долоо хоног, сарын дотор турчих юм шиг ид шидэд итгэдэг. Богино хугацаанд жингээ хасахгүй бол сэтгэл санаагаар унаж, шантардаг. Би турахдаа хоёр жил зарцуулсан. Сүүлдээ дасгал хийхгүй л бол бие тавгүйтэж, ямар нэг зүйл дутагдаад байдаг болчихдог юм билээ. Одоо тэр үеэ бодоход харьцангуй залхуу болжээ. Надад хэмжээ чухал биш, бие эрүүл, хэвийн хэмжээтэй байх л чухал. Иймэрхүү зүйлд анхаарахаа больсон.
-Өөртөө сэтгэл хангалуун бус үе тохиолдож байв уу?
-Эмэгтэй хүн болгон тийм, ийм болчих юмсан гэж мөрөөддөг байх. Хамгийн хөөрхөн бүсгүй ч гэсэн ямар нэгэн юм хүсдэг гэнэ лээ. Гэхдээ надад биеийнхээ хэсгээс онцгойлж, айхтар дургүйл хэж байсан удаа байхгүй.
-Валентины бая рыг яаж тэмдэглэв. Хэзээ гэр бүлтэй болох гэж байна вэ?
-Энэ жил буузнаасаа салаагүй байтал Валентин болчихлоо. Леонардо Де Каприогийн тоглосон “Ромео, Жульетта хоёр” киног гал тогооны өрөөндөө ганцаараа үзсэн. Одоогийн байдлаар гэрлэхэд яарахгүй байна. Жамаараа болох биз дээ.
No comments:
Post a Comment