Толинд дурласан бүсгүй

Десант: Цаг хугацаа өнгөрөхөд хамууд ах дүүс болдог

 Сэтгэл догдлуулам намуухан дахилттай хайрын дууны хэмнэлд тааруулан шүлэглэж, охидыг уяраан түүнийгээ хип хоп гэдэг моод нэгэн үе дэлгэрч байсан. Хип хопыг буруу тийш залж байсан энэ үед реппер GEE-гийн толгойлдог “Click click boom” болон “Gangsta service” тэргүүтэй хэд хэдэн бүлэг гарч ирсэн нь манай хип хопын хөгжилд бас нэгэн өнгө нэмж, үзэгдэл болсон юм. CCB –д харьяалагдаж, “Gangsta service” бүлгийг толгойлдог реппер Десанттай ярилцлаа. Зарим хүнд түүний дуунууд хэтэрхий танхай, бүдүүлэг санагдаж дургүйг нь хүргэж магадгүй л юм. Гэхдээ “жинхэнэ хип хоп”-ын мөн чанар ийм учраас яалтай ч билээ. Амьдралыг гоёчилж, үнэн мөнийг уянгын халилгүйгээр илэрхийлж, хатуу үгээр бухимдлаа тайлдгаараа хип хоп бусдаас өөр, өвөрмөц гэгддэг.

-“Click click boom” бүлэг шинэ цомгийнхоо ажилд орсон гэсэн. Цомгоо хэзээ худалдаанд гаргах вэ?

-“Нүүдэл” нэртэй цомгоо энэ онд багтаан гаргана. Бүлгийн гишүүд өөр өөрийн онцлогоор үглэсэн арав гаруй дуутай. Өнгөрсөн жил “Үл хөдлөх хөрөнгө” хэмээх цомгоо гаргах гэсэн боловч санхүүгийн асуудлаас болоод интернэтээр л цацсан. Бидний ихэнх нь хүний хань, хүүхдийн эцэг болсон учраас энэ цомог өмнөхөөсөө арай өөр байх болов уу.

-Танай бүлэг хэзээ байгуулагдсан бэ. Түүхээсээ хуваалцахгүй юу.

-Анх FM 98.9 радиогийн реппер үүд хоорондоо үгээрээ өрсөлддөг “Mic thing” нэвтрүүлэгт оролцох үеэр GEE-тэй танилцсан. Тэгээд л зорилго нэгтэй нөхдүүд нийлж, 2006 онд бүлгээ байгуулсан. Манайхан бүгд өөр өөрийн гэсэн үүрэгтэй. GEE менежмент хариуцдаг бол КА зураг авч, цомгийн дизайнаа хийдэг. Харин Асо граффит зурж, Зөгий шивээс хийдэг. Цаг хугацаа өнгөрөх тусам хамууд ах дүүс болдог гэдэг үг бий. Бид одоо нэг гэр бүл шиг болсон.

- Хоёр бүлэгт зэрэг харьяалагдах хүндрэлтэй юү. Тэд хоорондоо ямар харилцаатай байдаг вэ?

-“Click click boom” болон “Gangsta service”-ийнхэн өөр өөр урсгалаар дуугаа хийдэг, өөр өөр ертөнцтэй хүмүүс. CCB нийгмийн, амьдралын тухай дуулдаг бол “Gangsta service” хүний наймаа, хүчирхийллийн тухай, бидний амьдардаг гудамжинд ямар амьдрал өрнөдөг тухай илэрхийлдэг. Хоёр бүлгийнхэн маань заримдаа хоорондоо Freestyle (Урьдчилан бэлдсэн дууны хэсгээс үглэхгүйгээр тухайн цаг үедээ шууд сүүл толгой холбон зохиох) хийдэг.

-Тэгээд аль нь дийлдэг вэ?

-Багт хуваагаад, цаг хараад үглэдэггүй учраас ялагч байхгүй.

-GEE, Цэцэ хоёр нэг хэсэг дуугаараа “байлдсан”. Тэгэхэд нэг нь гэр хорооллынх, нөгөө нь хотын төвийнх гээд л энэ тухайгаа дуундаа тусгасан. Та ч гэсэн “Гэр хороолол соёлын нөгөө тал” гэж дуулж байсан. Амьдардаг орчин дуунд хэр нөлөөлдөг вэ. Та нарын дууг хэтэрхий хараал ихтэй гэж хүмүүс шүүмжилдэг.

-Репперүүд бүгд л өссөн газар, хүрээлсэн хүмүүсийнхээ тухай дуулдаг. Ямартай ч гудамжнаас ирсэн реппер гудамжныхаа тухай дуулж байна. Тэнд амьдрал ямаршуухан өрн өдгийг зарим хүн мэддэггүй. Уран сайхангүй, бодит байдлыг тэр чигээр нь дуулж, гэр хороололд болдог гэмт хэрэг, хүчирхийлэл зэрэг нийгмийн бохир зүйлийг эрээ цээргүй харааж, ерөөж дуулдгаараа gangsta rap урсгал онцлог. Хараалтай дуу дуулдагт бидний өссөн орчин, нийгмийн бухимдал нөлөөтэй.

-“Хамууд”, “Хам”, “Хамаа би чамд хайртай” гээд нөхөрлөлийн тухай олон дуутай юм. Хип хопууд найз гэхийг яагаад хам гэдэг юм бэ. Шоронгийн хэллэг биш үү?

-Найз нөхдийн тухай бодлоо өөртөө үлдээе. Ямартай ч миний хувьд нөхөрлөл бол гэр бүл шиг л эрхэм учраас нандигнадаг. Хам гэдэг бол хип хоп хэллэг. Энэ нь найз гэдгээс илүү дотно сонсогдохгүй байна гэж үү?