“Х ТҮЦ” хамтлагийн “Сэрүүн хасын нууц” эмгэнэлт драмын жүжиг өнөөдөр Соёлын төв өргөөнд нээлтээ хийнэ. Тэдний тоглолтын бэлтгэлийг сурвалжлахаар өчигдөр 19.00 цагийн үед очсон юм. Нэг нь жүжигт хэрэг болох материал олохоор дэлгүүр явж, нөгөө нь тайзаа засаж, хаа сайгүй хүмүүс гүйлдэнэ. Соёлын төвийнхөн ч үзэгчдийнхээ суудлыг угааж, арчаад тун завгүй. Тайванийн алдарт зохиолч Чюн Яогийн “Сюэкө бүсгүй” туужийг И.Одончимэг жүжиг болгон сийрүүлснээр үзэгчдэд хүрэх юм. Хүн төрөлхтний мөнхийн сэдэв үнэнч хайр, нэр төрөө хамгаалахын тулд юугаа ч хайрладаггүй эрхэм дээдсүүдийн дэг жаяг, угсаа гарлын ялгаа, журамт бүсгүйн хөөрхийлөлтэй хувь тавиланг үзүүлэх эл жүжигт “Х ТҮЦ”- ийнхнээс гадна хэд хэдэн уран бүтээлч урилгаар тоглож буй.
Хүчээр богтлогдсон Сюэко бүсгүйн хурим
Төрийн шагналт, ардын жүжигчин Н.Сувд хүүгийнхээ төлөө бүгдийг хийдэг, хатуу сэтгэлт Луо хэмээх ямбатан авхайн дүрийг бүтээх бол, гавьяат жүжигчин Ш.Дэлгэржаргал Чин Вангийн шивэгчин Жоума эмгэнд тоглоно. Жүжигчин Н.Ялалт Жоумагийн хүү, Сюэкө бүсгүйн хайртай хархүү, Сяо Юйдянь охины аав болох Ямөний дүрийг бүтээх аж. 13 үзэгдэлтэй эл жүжигт нийт таван тайз солигдоно. Тэд жүжгийн үеэр хэн, юуг зөөж тайзыг өөрчлөх зэргийг хуваарилж байлаа. УДЭТ-ын ерөнхий зураач Т.Ганхуягаар удирдуулсан баг тайзыг сарын турш урласан гэнэ. Т.Ганхуяг “Манжийн төр унаад Дундад иргэн улс байгуулагдсан 1905-1915 оны хятад ахуйг харуулахыг зорьж байна. Даавуу, аргелит, фанер, хөөсөнцөр гээд хямд төсөр, зөөхөд амар хөнгөн материалууд ашигласан” гэв. Тайз тэр чигээрээ улаан болжээ. Алтан шаргал луун хээтэй хос багана, торгон хөшигтэй модон ор, тансаг ваарнууд, бас ёслолын хувцастай Т.Бархүү, И.Одончимэг хоёр... Нэгэнт сэтгэлтэй хүнтэй болсон Сюэкө бүсгүй Луо овогтын хүү Жигантай хүчээр хурим хийж буй нь энэ аж. Түүний эцэг манж угсааны вантан охиноо хааны удмын хүнтэй суулгахаар эрт цагт хуримын товыг гаргасан аж.
Энэ үзэгдэлд Жиган сүйт бүсгүйнхээ гивлүүрийг сөхөөд ямар хөөрхөн юм бэ хэмээн дуу алдан биширдэг. Хуриманд хэрэглэх гивлүүр олдоогүй учраас урд хөршөөс захиж авчруулсан гэнэ. Жүжигт нийт 20 гаруй хүн тоглох бөгөөд тэдний хувцас, хэрэглэл нэг бүрийг шинээр захиалан хийлгэжээ. “Хуань Жу гэг” кинон дээр гардаг шиг толгойн гоёл, хээ хуар болсон өнгө өнгийн торгон дээлтэй хүмүүс өөрийн гарах үзэгдлийг хүлээнгээ дүрээ сургуулилна. Зарим нь бүр ганцаараа ч ярьж харагдсан. Жүжигчин Аглуу буюу Л.Баттулга Чин Вангийн дүрд тоглож байгаа. Саяхан л хажууд сууж байсан хөгжилтэй яриатай ах нэг мэдэхэд тайзнаа үсрэн гарч, өөрийнхөө хэсэгт чадварлаг тоглов. Тэрбээр дүрдээ сайн орж, их Вангийн сүрийг үзүүлж байснаа гэнэт л залуу жүжигчинд хандан “Одоо хойд талаар нь яв, тэгээд буцаж ирээд байрандаа зогс” гэж зөвлөөд дахин хөмсгөө зангидав. Энэ мэтээр бэлтгэл үргэлжилсээр...
Тэд 11.00 цагаас шөнийн 23.00 хүртэл бэлтгэлээ хийдэг гэнэ. Ес орчим насны нэгэн охин жүжигчин Н.Ялалтыг “Ааваа хамт явчихаад ирье” гэхээр нь хүүхэд нь ирж дээ гэж бодлоо. Тэгсэн уг жүжигт Н.Ялалтын охины дүрд тоглож буй У.Цасжин түүнд бүр дасаж, ингэж дууддаг болсон аж. “Эмгэнэлт жүжигт хүүхэд тоглож байсан удаагүй. Энэ жүжиг хүүхэд тоглож болохоор бичигдсэн. Нөгөө талаас хүүхэд тогловол хүний зүрхэнд илүү хүрнэ байх” хэмээн “Сэрүүн хасын нууц” жүжгийн найруулагч Ч.Найдандорж хэлж байсан. Сяо Юйдянийн дүрд “Цоглог” студийн У.Цасжин, Монголын хүүхдийн ордны драмын дугуйлангийн Э.Анужин нар тоглож байгаа юм. Тоолбол нас чацуу, төөлбөл бие чацуу алаг нүдэн ихэр гэмээр эл хоёр охин хэл ам сугалчих гээд сэргэлэн гэж жигтэйхэн. Энэ хоёрт уйлж гардаг хэсэг хэд хэд байдаг. Их уйлах хэцүү байна уу гэхэд “Хэцүү биш ээ. Угаасаа би их уйланхай. Бидний тоглож байгаа хэсэгт эмээ нь үхдэг. Би эмээтэйгээ амьдардаг л даа. Эмээгээ үхэж байна гэж дотроо төсөөлөхөөр шууд уйлчихдаг юм” хэмээн Э.Анужин хариулсан.
У.Цасжин “Ядрахгүй байгаа. Чанга яриад сурчихвал өөр хүндрэлтэй зүйл байхгүй байна. Заримдаа даалгавраа хийж амжихгүй үе гардаг. Хичээл эхлэхээс өмнө сургууль дээрээ, эсвэл энд даалгавраа хийдэг. Анужин гэдэг сайн найзтай болсондоо баяртай байна” гэв. Бэлтгэл дээр ҮДБЭЧ-ын бүжиг дэглээч, гавьяат жүжигчин А.Даваахүү ирэв. Тэрбээр Сюэкө, Жиган хоёрын хуриман дээр бүжиглэх лууны бүжгийг зааж байгаа аж.
Алтлаг өнгөтэй, араа шүдээ яралзуулсан лууны баг нөмөрсөн зургаан залуу хэц, хэнгэрэгний аянд тохируулан бүжгээ бэлдэв. Зургаан бие нэг цул болж, биесээ мэдрэн, луу мэт тахиралдан нумрах хэцүү аж. Урд талаасаа хоёр дахь залуу хэтэрхий өндөрдөж лууг бөгтөр мэт харагдуулав. Түүнийг харсан Т.Бархүү “Хөгжлийн бэрхшээлтэй луу юм уу хаашаа юм” гэхэд цаанаас нь Аглуу “Квазимодо гэдэг луу байхгүй юу” хэмээн нэмж даапаалав. “Аянгын бороо” жүжигт тоглолгүй өнжсөн жүжигчин Н.Онон энэ удаа ч бас тайзны ард үлдэв. Түүнд тохирох дүр бас л байгаагүй гэнэ. Тэрбээр “Хорхой хүрээд, жүжигтээ тогломоор л байсан. Үнэхээр надад тохирох дүр байгаагүй учраас яая гэх вэ. Гэхдээ одоо бол арын ажлыг амжуулаад, хорхой хүрэх завгүй явна” хэмээсэн.
Мандухай сэцэн хатны дүрээрээ монголчуудын сэтгэлд хоногшсон Төрийн шагналт, ардын жүжиг чин Н.Сувд энэ удаа бэрдээ хатуурхдаг хадмын дүрийг бүтээх юм. Түүнтэй цөөн хором ярилцсанаа хүргэе.
-Яагаад “Х ТҮЦ”-ийн жүжигт тоглохоор болсон бэ?
-Намайг урьсан учраас зөвшөөрсөн. Мөн манай театрын “нээлттэй байх” бодлогод нийцэж байгаа. Манай уран бүтээлчид студи, продакшн, телевиз гээд бүх газрын уран бүтээлд тоглох боломжтой. Том хэмжээний драмын уран бүтээл олон байгаасай гэж театрынхан хүсдэг. Жүжиг тавьдаг газар олон байвал хоорондоо өрсөлдөж, туршлага солилцох учраас театрын урлаг ч бас хөгжинө.
-Та дүрийнхээ тухай танилцуулахгүй юу?
-Миний дүр энгийн нэгэн ээжийн л дүр. Луо авхай бол хүүгийнхээ ирээдүйн төлөө санаа зовниж буй ээж хүн. Ээж бүр хүүхдийнхээ сайн сайхны төлөө бүхнээ зориулж, өөр өөрийн араншин, байр сууринаас асуудалд ханддаг шүү дээ.
No comments:
Post a Comment