...Энэ борооны дараа солонго чи татах уу
Хүрч амжаагүй байхад дахин замхран одох уу
Заавал чамайг бараан үүлэн дундаас хайх уу
Хүрч чадахгүй тийм нэг мөрөөдлийг минь чи мэдэх үү
хэмээх үгтэй хайрыг замхран одох солонготой зүйрлэсэн “Хүрч чадахгүй” дуугаараа үзэгчдийн сэтгэлд ойртсон “Пипс”хамтлагийн гитарчин Б.Чойжилсүрэнтэй ярилцлаа
-Хөгжим бүжгийн коллежийн хийлийн анги төгссөн гэсэн. Яагаад гитарчин болчихов оо?
-Ээж минь эгч бид хоёрыг урлагийн хүн болгохоор нэгийг нь төгөлдөр хуур, нөгөөг нь хийлийн ангид оруулсан. Эгч маань одоо “Kush and Oyuka” хамтлагийн төгөлдөр хуурч. Ээж залуудаа хамтлагтай байсан. Багадаа гитар тоглохыг ээжээрээ заалгаж, сарын дараа ээждээ багшилдаг болсон. Ээж миний хамгийн том фен. Би есдүгээр ангиасаа сургуулиасаа гарсан. Хүссэнээ хийгээд, дуртай юмаараа амжилт олох нь миний зорилго. Надад дуу хөгжмөөс өөр чадах зүйл байхгүй.
-Эгчтэйгээ хамтарч хийх үү?
-Бид бие биенээ голоод байдаг юм. Гэхдээ хэзээ нэгэн цагт хамтрах байх.
-“Пипс” хамтлагийн гитарчин хэзээнээс дуулдаг гэдгээ мэдсэн бэ?
-Урьд нь хамтлагтаа хоолой хийдэг байсан. Гэхдээ “Пипс”-ийн дуучин тусдаа учир хамтлагтаа дуулахгүй. Үеэл дүү минь жилийн өмнө нас барснаас хойш дуулахаар шийдсэн. Бид хоёр ижил нэртэй, нэг өдөр төрсөн. Тиймээс олон хүн миний дүүгийн нэрийг дуудаасай, хүндлээсэй гэж хүссэн юм.
-“Хүрч чадахгүй” дуугаар тань хүмүүс мэддэг. Энэ дууны бүтсэн түүхээс хуваалцахгүй юу?
-Найз Ган-Эрдэнэтэйгээ уулзахаар гэрт нь очлоо. Тэгээд гэнэт л хоёулаа дуу зохиохоор шийдээд, тэднийхээс цухуйлгүй гурав хоносон. Сэтгэлдээ байдаг хүнээ бодож, бусдын оронд өөрсдийгөө тавьж үзээд үг, аяыг нь зохиосон.
-Бороо орсон өдөр илүү мэдрэмтгий болдог гэдэг. Та ямар үед дуу хиймээр санагддаг вэ?
-Бороонд юм бодоод алхах сайхан шүү. Үнэрт нь дуртай. Харин дуу бичихдээ нартай, бороотой, өдөр, шөнө хамаагүй санаанд орсон үед нь бичиж аваад, дараа нь боловсруулж ажилладаг. Дуугаараа өөрт тохиолдсон зүйл, мэдрэмж, эсвэл хүмүүсийн хэлэх гээд хэлж чаддаггүйг илэрхийлэхийг хичээдэг.
-Цомгоо гаргах гэж байгаа гэсэн үү?
-Энэ сарын дундуур “Оддын дунд үлдсэн дүр” цомгоо худалдаанд гаргах төлөвлөгөөтэй байна. Есөн дуутай цомгийн дууны бичлэг дууссан. Дүүдээ зориулж хийсэн хамгийн чухал дуугаараа цомгоо нэрлэсэн.
-Танай хамтлаг яагаад таг чиг болчихсон бэ. Нэрнийхээ учрыг тайлбарлахгүй юу?
-Уулзахаараа дуу хийнэ гэж ярьдаг ч цаг зав амжихгүй юм. Манай басс гитарчин Тэмүүлэн англимонгол толь эргүүлээд санамсаргүй сонгосон үг нь пипс байсан. Жимсний үр үндэс гэсэн утгатай үг юм билээ.
-Амьд хөгжмийн хамтлагууд, шинэ залуу дуучид дуулдаг газар тай байдаг. Та клубт дуулдаг уу?
-Тогтмол дуулдаг газар байхгүй ч тэмдэглэлт арга хэмжээн дээр хааяахан очно оо. Арванхоёр, арвангуравтайдаа зоогийн газруудаар явж, хүмүүсийн ширээн дээр очоод 1000, 2000 төгрөгөөр гитар, хийл тоглож, жижигхэн “бизнес” эрхэлдэг байлаа. Урлагийн хүн үнэ цэнэтэй байх хэрэгтэй гэж боддог. Хүмүүс нэг газар суугаад шар айраг уух далимаараа миний дуулахыг сонсоосой гэж хүсэхгүй байна. Би тийм маягаар халаасныхаа мөнгийг олж болох ч үнэ цэнэ, нэр хүнд байх ёстой. Үнэхээр л миний дуулахыг сонсмоор санагдвал хүсэн хүлээж байгаад тоглолтыг минь зорьж очвол сайхан шүү дээ.
-“Play time”-ыг хараад байхад сүүлийн үед чанартай, чанаргүй амьд хөгжмийн олон хамтлаг шинээр төрж байна. Энэ талаар ямар бодолтой байдаг вэ?
-Хамтлаг олон байх тусам ашигтай. Тэр дунд л өрсөлдөөн явагдаж, шилдгүүд төрнө. Харин ч илүү олон болоосой. Дуртай ажлаа хийгээд явахад сайн нь аяндаа ялгардаг. Сүүлийн үеийн хамтлагуудаас “The Colors”-ыг үнэлдэг.
-Гитар, хийлээс өөр хөгжим тоглодог уу?
-Төгөлдөр хуур тоглодог. Гэхдээ мэргэжлийн хэмжээнд чадахгүй. Хөгжүүлээгүй ч бүжиглэх авьяас байдаг гэж боддог. Багадаа балетийн ангид сурдаг байсан.
-Алинд нь илүү дуртай вэ?
-Өөрийгөө сайн илэрхийлж чаддагаараа гитарт дуртай. Хүссэн хэмжээндээ тоглож чаддаггүй ч төгөлдөр хуурт бас сонирхолтой.
No comments:
Post a Comment