Эмэгтэй хүний хиргүй тунгалаг сэтгэл, ариун эмзэгхэн ертөнцийг “Үл таних эмэгтэй”-н дүрээр чадварлаг гаргаж, олны танил болсон жүжигчин бол О.Долгор. Тэрбээр нярайлаад удаагүй байхдаа “Микроны босс”, “Хөлтрөг” кинонд тоглосон хөдөлмөрч, дайчин эмэгтэй. Түүнийг энэ удаагийн “Залуус” буландаа урилаа.
-Сүүлийн үеийн уран бүтээлийн сониноосоо хуваалцахгүй юу?
-SBN телевиз долоон жилийн ойдоо зориулж “Сувдан даруулга” хэмээх 30 ангит кино хийх гэж байгаа. Богд хаан олноо өргөгдсөн автономит төр байгуулагдахын өмнөх Монгол орны байдал, язгууртан айлын амьдралыг харуулсан кинонд Хулангоо охины дүрд тоглоно. Түүхэн киноны гол дүрд анх удаа тоглох гэж байгаа учраас сонирхолтой санагдаж байна.
Ирэх аравдугаар сараас зургаа авч, арванхоёрдугаар сард дэлгэцнээ гаргах юм билээ. Нэг нууц задлахад манайхан гаднын уран бүтээлчидтэй хамтарч нэгэн түүхэн кино хийх гэж байгаа. Энэ бүтээлд моринд эрэмгий, дайчин бүсгүйн дүрд тоглохоор болсон.
-2006 онд КУДС-ийг төгссөн гэсэн. Хэзээнээс жүжигчин болохоор шийдсэн бэ. Багадаа жүжигчин болж тоглодог байв уу?
-Хүүхдүүд том болоод тийм хүн болно, ийм ажил хийнэ гэж мөрөөддөг. Харин би тэгж ярьдаггүй байсан. Гадаад харилцааны чиглэлээр сурахаар төлөвлөж байсан ч төгсөлтийн шалгалт өгөх үедээ жүжигчин болохоор шийдсэн. Ийм сайхан мэргэжил сонгосондоо одоо баярладаг.
-Олонх хүн таныг “Үл таних эмэгтэй” киногоор мэддэг. Анх ямар кинонд тоглож байсан бэ?
-2009 оноос уран бүтээлийн гараагаа эхэлсэн. “Үл таних эмэгтэй”-гээс өмнө “Төрийн дайсан”, “Үнэнээс хол”, “Эзэнгүй бөгж” гээд зургаан кинонд тоглосон.
-УДЭТ-т орох бодол бий юү?
-Уран бүтээлийн санал арвин байна. Одоогоор тийм бодол алга.
-Сүүлийн үед кинонд тоглох санал олон ирж байгаа юм байна. Ямар дүрд тоглохыг хүсдэг вэ?
-Тоглосон кинонуудаа эргээд бодоход дандаа эерэг талын, уян зөөлөн бүсгүйн дүрд тоглодог . Нэгэн хэвийн дүрд тоглоод байвал шүүмжлүүлэх хандлагатай. Надад ирж байгаа саналуудын ихэнх нь ийм дүр байдаг. Уран бүтээлч хүн ямар ч дүрийг бүтээж чадах ур чадвартай байх хэрэгтэй. Аль болох өөрийгөө эвдэж, надаас гарч болох бүх л зан чанарыг харуулмаар байна. Киноны саналд ч дүрийн зан араншинг анхаарч сонгож байгаа. Найруулагчид намайг арай өөр талаас харж, сонгоосой гэж хүсэж байна.
-Ямар киноны саналаас татгалзах вэ?
-Ур чадвар шаардсан дүр л байвал татгалзах шалтгаан байхгүй. Төрөл жанр харгалзахгүй.
-Одоо ярилцаад суухад бүтээсэн дүрүүдээсээ хол зөрөхөөргүй ухаалаг яриатай, даруухан бүсгүй шиг санагдаж байна. Өөрийгөө юу гэж тодорхойлох бол?
-Эргэн тойрны хүмүүс л дүгнэх байх. Гэхдээ тоглосон дүрүүд шигээ даруухан, энхрий ялдам, зөөлөн хүн гэж хэлэхэд хэцүү. “Үл таних эмэгтэй”-н Зулаа шиг сул дорой биш ээ. Эмэгтэй хүн гаднаасаа сул дорой мэт харагдавч дотроо сэтгэлийн хаттай, хамгийн их тэвчээртэй хүмүүс байдаг.
-Та амьдралын тайзан дээр хэр сайн жүжиглэж байна даа?
-Дандаа жүжиглээд байвал амьдрал утгагүй. Үнэ цэнээ алдана. Гэхдээ хааяахан жүжиглэнэ ээ. Хүүхэд хүмүүжүүлэхэд жүжиглэх хэрэг гардаг юм билээ. Охины маань шилжилтийн нас эхэлж байна. Зөв хүн болгож төлөвшүүлэхийн тулд ээж нь багадаа ингэдэг байсан, тэгдэг байсан гээд л өөртөө сайн чанарууд шингээж жүжиглэнэ ээ.
-Өнгөцхөн харахад урлагийн мэргэжил хамгийн цэвэрхэн, сайхан ажил мэт боловч хүнд хэцүү, хар ажил гэдэг. Шантрах үедээ өөрийгөө хэрхэн зоригжуулдаг вэ?
-Бэрхшээл мэр сэр тохиолдоно оо. Ажлын ачаалал ихтэй үед хүүхэд өвдөх үнэхээр хэцүү. Тийм үед хүүхдээ орхиод л ажлаа сонгодог доо. Харин өөрөө даарч хөрч, нойр хоолгүй ажиллах сонин биш.
-Энэ их ажлын хажуугаар гэрийн эзэгтэйн үүргээ хэр сайн биелүүлж байна вэ. Чөлөөт цагаараа юу хийдэг вэ?
-Өөрийгөө сайн ээж, эхнэр гэж бодож байна. Урлагийн буянд бурхан тэнгэр харж үзээд ажил амьдралаа амжуулаад л байна. Киноны зурагтай үед чөлөөт цагийн тухай бодоод ч хэрэггүй. Харин зав гарвал алдагдсан эрч хүчээ нөхөж, гэртээ витаминжуулалтын аян өрнүүлдэг дээ.
-“Микроны босс” инээдмийн кинонд тоглоод удаагүй байхдаа “Хөлтрөг” аймшгийн, сэтгэхүйн драмын бүтээлд ажилласан. Энэ үеэр сэтгэлзүйн өөрчлөлт гарсан уу?
-Эсрэг тэсрэг, киноны ажиллагаа нь ч ондоо байсан. Тэр нь амархан, энэ нь хэцүү гэхгүй. Хоёр өөр дүрд тоглосондоо олзуурхаж байгаа. Сэтгэхүйн драмын кинонд тоглоход сэтгэлзүйн дарамт, сэтгэл санааны өөрчлөлт гардаг. Гэхдээ түүнийг нь дүрдээ ашигтайгаар эргүүлдэг.
-“Өдөр өдрийн нар” кинонд тоглож байхдаа нөхөр Б.Чинзоригтойгоо танилцсан гэсэн үү?
-Мэдээж уран бүтээлээрээ дамжуулж танилцсан. Гэхдээ нэгээр тогтохгүй бүтээл дээр тааралдаж байж дотноссон. Энэ миний хань болно гэж шууд мэдэхгүй шүү дээ. Эхлээд хэд хэдэн чанар нь таалагдаж, сүүлдээ хань болох хэмжээнд хайрласан.
-Ханийнхаа хамгийн их баярлуулсан үеэс хуваалцахгүй юу?
-Эд материалаар баярлуулсныг нь ярьж болох ч сэтгэлийн бэлэг, урам хамгийн чухал. Үргэлж намайг дэмжин ойлгодогт нь баярлаж явдаг.
-Та фэйсбүүк хуудастаа алдартай хүмүүсийн хэлсэн үг, ишлэл байнга нийтэлдэг юм билээ. Амьдралдаа баримталдаг зарчим бий юү?
-Тийм үгнүүд их гоё шүү дээ. Гэхдээ амьдралынхаа зарчим болгож амьдардаг гэж хэлэхгүй. Мундаг хүмүүсийн хэлсэн үгнээс өөртөө тусгаж, хэрэгжүүлж болохыг нь фэйсбүүк хуудастаа нийтэлдэг. Эмэгтэй хүн дотоод хүчтэй байх хэрэгтэй. Бусдаас их зүйлийг харж, хүлээх хэрэгг үй. Өөрөөсөө сайн сайхныг цацруулж явбал аяндаа үйлс бүтнэ гэж ойлгодог.
-Олны танил хүмүүсийг үнэн худал мэдэгдэхгүй хов жив дагадаг. Энэ бүхнийг хэрхэн хүлээж авдаг вэ?
-Цахим хуудсуудад нийтлэгдсэн өөрийнх өө талаарх мэдээллийн хүмүүсийн бичсэн сэтгэгдлийг сонирхож үзсэн. Миний тухай надаас илүү мэддэг юм шиг л бичдэг юм билээ. Намайг хурцлах, үнэхээр үнэн шүүмж байвал баяртайгаар хүлээж авна. Гэтэл тийм зүйл огт харагдаагүй учир ач холбогдол өгөхөө больсон.
-Олон кинонд жүжигчин С.Болд-Эрдэнэтэй хос болж, найруулсан кинонд нь тоглолоо. Хамтрагчийнхаа тухай бодлоо хуваалцаач?
-Миний алтан портнёр шүү дээ. Хамтрагчид бие биедээ их нөлөөлдөг. Болд-Эрдэнэ ах надад зөв үлгэр дуурайл үзүүлж, сайн ойлголцдог. Хамгийн их хүндэлдэг жүжигчдийн нэг.
-Хэнтэй хамтарч кинонд тоглохыг хүсэж байна вэ?
-Мэдээж нөхөртэйгөө тогломоор байна.
-Та хоёрын гэрлэлт хэн хэнийх нь хоёр дахь нь. Дахин амьдрал зохиоход хэцүү гэдэг. Таны хувьд ямар байна вэ?
-Хүний амьдрал сайн, муу ээлжилдэг учир анхны гэрлэлт, одоогийн амьдрал аль аль нь эрээнтэй, бараантай. Гэхдээ хоёр дахь гэрлэлтэд сайн нь илүү давамгайлж байна. Нэгэнт амьдрал зохиохоор шийдсэн бол сонголтоо зөв хийж, салж сарнихгүй зөв амьдрах хэрэгтэй. Гэхдээ болохгүй байгаа юмыг болгох гэж хүчлэх хэцүү.
No comments:
Post a Comment